triMshikAvij~naptikArikAH

AtmadharmopacAro hi vividho yaH pravartate .
vij~nAnapariNAme .asau pariNAmaH sa ca tridhA .. 1 ..
vipAko mananAkhyashca vij~naptirviShayasya ca .
tatrAlayAkhyaM vij~nAnaM vipAkaH sarvabIjakam.h .. 2 ..
asaMviditakopAdisthAnavij~naptikaM ca tat.h .
sadA sparshamanaskAravitsaMj~nAcetanAnvitam.h .. 3 ..
upekShA vedanA tatrAnivRRittAvyAkRRitaM ca tat.h .
tathA sparshAdayastacca vartate srotasaughavat.h .. 4 ..
tasya vyAvRRittirarhatve tadAshritya pravartate .
tadAlambaM manonAma vij~nAnaM mananAtmakam.h .. 5 ..
kleshaishcaturbhiH sahitaM nivRRitAvyAkRRitaiH sadA .
AtmadRRiShTyAtmamohAtmamAnAtmasnehasaMj~nitaiH .. 6 ..
yatrajastanmayairanyaiH sparshAdyaishcArhato na tat.h .
na nirodhasamApattau mArge lokottare na ca .. 7 ..
dvitIyaH pariNAmo .ayaM tRRitIyaH Sha~Nvidhasya yA .
viShayasyopalabdhiH sA kushalAkushalAdvayA .. 8 ..
sarvatragairviniyataiH kushalaishcaitasairasau .
saMprayuktA tathA kleshairupakleshaistrivedanA .. 9 ..
AdyAH sparshAdayashChandAdhimokShasmRRitayaH saha .
samAdhidhIbhyAM niyatAH shraddhAtha hrIrapatrapA .. 10 ..
alobhAdi trayaM vIryaM prashrabdhiH sApramAdikA .
ahiMsA kushalAH kleshA rAgapratighamUDhayaH .. 11 ..
mAnadRRigvicikitsAshca krodhopanahane punaH .
mrakShaH pradAsha irShyAtha mAtsaryaM saha mAyayA .. 12 ..
shAThyaM mado .avihiMsA hrIratrapA styAnamuddhavaH .
Ashraddhyamatha kaushIdyaM pramAdo muShitA smRRitiH .. 13 ..
vikShepo .asaMprajanyaM ca kaukRRityaM middhameva ca .
vitarkashca vicArashcetyupakleshA dvaye dvidhA .. 14 ..
pa~ncAnAM mUlavij~nAne yathApratyayamudbhavaH .
vij~nAnAnAM saha na vA tara~NgANAM yathA jale .. 15 ..
manovij~nAnasaMbhUtiH sarvadAsaMj~nikAdRRite .
samApattidvayAnmiddhAnmUrChanAdapyacittakAt.h .. 16 ..
vij~nAnapariNAmo .ayaM vikalpo yadvikalpyate .
tena tannAsti tenedaM sarvaM vij~naptimAtrakam.h .. 17 ..
sarvabIjaM hi vij~nAnaM pariNAmastathA tathA .
yAtyanyonyavashAd.h yena vikalpaH sa sa jAyate .. 18 ..
karmaNo vAsanA grAhadvayavAsanayA saha .
kShINe pUrvavipAke .anyadvipAkaM janayanti tat.h .. 19 ..
yena yena vikalpena yadyad.h vastu vikalpyate .
parikalpita evAsau svabhAvo na sa vidyate .. 20 ..
paratantrasvabhAvastu vikalpaH pratyayodbhavaH .
niShpannastasya pUrveNa sadA rahitatA tu yA .. 21 ..
ata eva sa naivAnyo nAnanyaH paratantrataH .
anityatAdivad.h vAcyo nAdRRiShTe .asmin.h sa dRRishyate .. 22 ..
trividhasya svabhAvasya trividhAM niHsvabhAvatAm.h .
saMdhAya sarvadharmANAM deshitA niHsvabhAvatA .. 23 ..
prathamo lakShaNenaiva niHsvabhAvo .aparaH punaH .
na svayaM bhAva etasyetyaparA niH svabhAvatA .. 24 ..
dharmANAM paramArthashca sa yatastathatApi saH .
sarvakAlaM tathAbhAvAt.h saiva vij~naptimAtratA .. 25 ..
yAvadvij~naptimAtratve vij~nAnaM nAvatiShThati .
grAhadvayasyAnushayastAvanna vinivartate .. 26 ..
vij~naptimAtramevedamityapi hyupalambhataH .
sthApayannagrataH kiMcit.h tanmAtre nAvatiShThate .. 27 ..
yadAlambanaM vij~nAnaM naivopalabhate tadA .
sthitaM vij~nAnamAtratve grAhyAbhAve tadagrahAt.h .. 28 ..
acitto .anupalambho .asau j~nAnaM lokottaraM ca tat.h .
Ashrayasya parAvRRittirdvidhA dauShThulyahAnitaH .. 29 ..
sa evAnasravo dhAturacintyaH kushalo dhruvaH .
sukho vimuktikAyo .asau dharmAkhyo .ayaM mahAmuneH .. 30 ..

triMshikAvij~naptikArikAH samAptAH .. ..
kRRitiriyamAcAryavasubandhoH .. ..